Prælegendum Sal 112,2-3
Noli flere, María, allelúia, allelúia, resurréxit Dóminus, allelúia,
allelúia. No llores, María, aleluya, aleluya, el Señor resucitó,
aleluya, aleluya.
V/. Sit nomen Dómini benedíctum ex hoc nunc et usque in sæculum. A solis ortu usque ad occásum laudábile nomen Dómini.
R/. Resurréxit Dóminus, allelúia, allelúia.
V/. Glória et honor Patri et Fílio et Spíritui Sancto in sæcula sæculórum amen.
R/. Resurréxit Dóminus, allelúia, allelúia.
Trisagium
Sanctus Deus, qui sedes super Chérubin, solus invisíbilis.
Sanctus fortis, qui in excélsis glorificáris vócibus angélicis.
Sanctus immortális, qui solus es inmaculátus Salvátor, miserére nobis, allelúia, allelúia.
V/. Dignus es, Dómine, Deus noster, accípere glóriam et honórem et virtútem.
R/. Sanctus immortális, qui solus es immaculátus Salvátor, miserére nobis, allelúia, allelúia.
V/. Quóniam omnes gentes vénient et adorábunt in conspéctu tuo, Dómine, et dicent,
R/. Miserére nobis, allelúia, allelúia.
V/. Benedíctio et honor et glória et fortitúdo tibi, Deo nostro, in sæcula sæculórum. Amen.
R/. Miserére nobis, allelúia, allelúia.
Post gloriam
Tibi glóriam concínimus, Dómine Deus noster, tuámque poténtiam
postulámus, ut sicut pro nobis peccatóribus dignátus es mori, et
clarificátus secúndo post tértium diem apparuísti in glória
resurrectiónis, ita per te absolúti in te mereámur habére perpétuum
gáudium, ita ut nobis præcéssit vere Resurrectiónis exémplum.
R/. Amen.
Per misericórdiam tuam, Deus noster, qui es benedíctus et vivis et ómnia regis in sæcula sæculórum.
R/. Amen.
LITURGIA VERBI
Prophetia Ap 1,1-8
Princípium Apocalípsis Ioánnis apóstoli.
R/. Deo grátias.
Apocalípsis Iesu Christi, quam dedit illi Deus palam fácere servis
suis, quæ opórtet fíeri cito, et significávit mittens per ángelum suum
servo suo Ioánni, qui testificátus est verbum Dei et testimónium Iesu
Christi, quæcúmque vidit. Beátus, qui legit et qui audiunt verba
prophetíæ et servant ea, quæ in ea scripta sunt; tempus enim prope est.
Ioánnes septem ecclésiis, quæ sunt in Asia, Grátia vobis et pax ab eo,
qui est et qui erat et qui ventúrus est, et a septem spíritibus, qui in
conspéctu throni eius sunt, et ab Iesu Christo, qui est testis fidélis,
primogénitus mortuórum et princeps regum terræ.
Ei, qui díligit nos et solvit nos a peccátis nostris in sánguine suo et
fecit nos regnum, sacerdótes Deo et Patri suo, ipsi glória et impérium
in sæcula sæculórum. Amen.
Ecce venit cum núbibus, et vidébit eum omnis óculus et qui eum
pupugérunt, et plangent se super eum omnes tribus terræ. Etiam, amen.
Ego sum Alpha et Ómega, dicit Dóminus Deus, qui est et qui erat et qui ventúrus est, Omnípotens.
R/. Amen.
Psallendum
Psal 117,16.24
Haec est dies quam fecit Dóminus, exsultémus et lætémur in ea.
V/. Déxtera Dómini fecit virtútem.
Déxtera Dómini exaltávit me.
R/. Exsultémus et lætémur in ea.
Apostolus
He 2,29-39
Léctio libri Áctuum Apostolórum.
R/. Deo grátias.
In illis diébus,
Stans Petrus in médio plebis, locútus est eis dicens, Viri fratres,
líceat audénter dícere ad vos de patriárcha David, quóniam et defúnctus
est et sepúltus est, et sepúlcrum eius est apud nos usque in hodiérnum
diem; prophéta ígitur cum esset et sciret quia iure iurándo iurásset
illi Deus de fructu lumbi eius sedére super sedem eius, próvidens
locútus est de resurrectióne Christi, quia neque derelíctus est in
inférno, neque caro eius vidit corruptiónem.
Hunc Iesum resuscitávit Deus, cuius omnes nos testes sumus.
Déxtera ígitur Dei exaltátus, et promissióne Spíritus Sancti accépta a
Patre, effúdit hunc, quem vos vidétis et audítis. Non enim David
ascéndit in cælos; dicit autem ipse,
«Dixit Dóminus Dómino meo, Sede a dextris meis,donec ponam inimícos tuos scabéllum pedum tuórum».
Certíssime ergo sciat omnis domus Ísrael quia et Dóminum eum et
Christum Deus fecit, hunc Iesum, quem vos crucifixístis.
His audítis, compúncti sunt corde et dixérunt ad Petrum et réliquos
apóstolos, «Quid faciémus, viri fratres?» Petrus vero ad illos,
«Pæniténtiam, inquit, ágite, et baptizétur unusquísque vestrum in
nómine Iesu Christi in remissiónem peccatórum vestrórum, et accipiétis
donum Sancti Spíritus; vobis enim est repromíssio et fíliis vestris et
ómnibus, qui longe sunt, quoscúmque advocáverit Dóminus Deus noster».
R/. Amen.
Evangelium
Io 20,1-18
Léctio sancti Evangélii secúndum Ioánnem.
R/. Glória tibi, Dómine.
Prima autem sabbatórum María Magdaléne venit mane, cum adhuc ténebræ
essent, ad monuméntum et videt lápidem sublátum a monuménto. Currit
ergo et venit ad Simónem Petrum et ad álium discípulum, quem amábat
Iesus, et dicit eis, «Tulerunt Dóminum de monuménto, et nescímus, ubi
posuérunt eum».
Éxiit ergo Petrus et ille álius discípulus, et veniébant ad monuméntum.
Currébant autem duo simul, et ille álius discípulus præcucúrrit citius
Petro et venit primus ad monuméntum; et cum se inclinásset, videt
pósita linteámina, non tamen introívit. Venit ergo et Simon Petrus
sequens eum et introívit in monuméntum; et videt linteámina pósita et
sudárium, quod fúerat super caput eius, non cum linteamínibus pósitum,
sed separátim involútum in unum locum.
Tunc ergo introívit et alter discípulus, qui vénerat primus ad
monuméntum, et vidit et crédidit. Nondum enim sciébant Scrípturam, quia
opórtet eum a mórtuis resúrgere. Abiérunt ergo íterum ad semetípsos
discípuli.
María autem stabat ad monuméntum foris plorans. Dum ergo fleret,
inclinávit se in monuméntum et videt duos ángelos in albis sedéntes,
unum ad caput et unum ad pedes, ubi pósitum fúerat corpus Iesu.
Et dicunt ei illi, «Múlier, quid ploras?».
Dicit eis, «Tulérunt Dóminum meum, et néscio, ubi posuérunt eum».
Hæc cum dixísset, convérsa est retrórsum et videt Iesum stantem et non sciébat quia Iesus est.
Dicit ei Iesus, «Múlier, quid ploras? Quem quæris?».
Illa, exístimans quia hortulánus esset, dicit ei, «Domine, si tu
sustulísti eum, dícito mihi, ubi posuísti eum, et ego eum tollam».
Dicit ei Iesus, «María». Convérsa illa dicit ei hebráice, «Rabbuni»,
quod dicitur Magíster.
Dicit ei Iesus, «Iam noli me tenére, nondum enim ascéndi ad Patrem;
vade autem ad fratres meos et dic eis, Ascéndo ad Patrem meum et Patrem
vestrum, et Deum meum et Deum vestrum».
Venit María Magdaléne annúntians discípulis, «Vidi Dóminum», et quia hæc dixit ei.
R/. Amen
Laudes
Psal 110,9
Allelúia.
V/. Redemptiónem misit Dóminus pópulo suo, mandávit in ætérnum testaméntum suum, sanctum et terríbile nomen eius.
R/. Allelúia.
Sacrificium
Io 1,29; Psal 106,2
Ecce agnus Dei, qui tollit peccátum mundi, allelúia.
V/. Dicant, qui redémpti sunt a Dómino, quos redémit de manu inimíci.
R/. Qui tollit peccátum mundi, allelúia.
V/. Glória et honor Patri et Fílio et Spíritui Sancto in sæcula sæculórum amen.
R/. Qui tollit peccátum mundi, allelúia.
Oratio Admonitionis
Lætétur cælum et exsúltet terra, rídeat mare, sol fúlgeat, serénitas
rédiit, pestis fúgiit, tempéstas désiit, cessit obscúritas; áerem crux
purgávit, tellúrem sanguis abstérsit, lignum corréxit.
Affíxus Deus, hóminem sic redémit, sed quantum ad immutabilitátem maiestátis exspéctat, múnere, non labóre.
Quia
cum perditiónis nostræ miseratióne cónsulens doluísset, non ad hoc
corpóreæ imáginem vilitátis assúmpsit, quasi contra degéneris
adversárii tyránnidem suis non posset áliter subveníre.
Sed præit quod eísdem prophetárum vaticínia erant complénda miráculis.
Eo
magis ut liberándis esset indubitáta cognítio, quod in primi
transgressóris offénsa mors operáta est, non imbecillitáte artifícii,
sed iniquitáte peccáti; quod male uténti pereúndi causa non fuit
fragílitas, sed volúntas, quod oríginem supplícii non óperis hábuit
corruptéla, sed críminis; quod conditiónem pœnæ non census státuit, sed
consénsus; quod labéndi vítium contumátia fuit creáti, non negligéntia
creatoris.
Te ipsum mihi interrogáre líceat.
Rediménte Dómino meo iam, auctor extránee, qua te primum diábolus parte
corrúpit? Numquid in faciéntis mánibus rimam córporis tui factúra
contráxerat?
Fúeras certe stábilis membris, si non fuísses instábilis in præcéptis.
Ánimum tuum tentátor obtínuit, in quo tibi maior pórtio crédita fúerat
dignitátis. Iudícium tuum in quo fúeras dimíssus exégit.
Vides, non Dómini, sed tui fúisse arbítrii, quod periísti.
Dicam omnípotens Deus, fassus véteris hóminis pravitátem, non tamen de præséntis statu libertátis ingrátus.
Non fuísset captivitátis obnóxius, si libertátis dóminus non fuísset.
Et in hoc útique clemens árbiter, et tuæ potestátis eminéntiam, et
præsumptiónis nostræ licéntiam confiténtes, petimus et rogámus, ut ita
præceptiónis tuæ consentiéntes fácias esse iudício, ut nobis ultra nec
líbeat peccáre nec líceat.
R/. Amen.
Ipso præstánte, qui in Trinitáte, unus Deus, vivit et regnat in sæcula sæculórum.
R/. Amen.
Alia
Bénedic, ánima mea, Dómino, et tota fidélis Christo plebs gáudia religiósæ gratulatiónis exséquere.
Amísit vetústas oppróbrium, mors acúleum, custódia reumm, caténa damnátum.
Non nobis in præiudício caro rebéllis assúrgat; non in dominátum
sanguis parricidális iure críminis intuméscat.
Homo est qui pérdidit; Deus homo factus est qui redémit.
Maiórem tibi exégit, Dómine, pietátem nostra calámitas, quam perdíderat
protoplaustórum effúsa libértas.
Tunc servi dicebántur futúri, nunc filii.
Tunc obœdiéntibus immortálitas promittebátur; nunc augétur et dígnitas.
Tunc pórtio habénda cum delíciis; nunc commúnio futúra cum Ángelis.
Tunc cum creatúra vivéndum; nunc cum Creatóre regnándum.
Tunc evitándus diábolus; nunc et subiciéndus edícitur.
Tunc erat admonítio de cautéla præcépti; nunc hortátio de pompa iudícii.
Tunc proponebátur in lege metus; nunc in voluntáte suggéstus.
Tunc non lícuit paradísum habére per culpam; nunc cælum speráre datur per grátiam.
Mélius ergo, multóque mélius crévimus post ruínam.
Propter quod humíllimi sine cessatióne rogámus, ut donec nos tua
curatióne perfícias, nostris tuam vulnéribus non súbtrahas medicínam.
R/. Amen.
Per misericórdiam tuam, Deus noster, in cuius conspéctu sanctórum
Apostolórum et Mártyrum, Confessórum atque Vírginum nómina recitántur.
R/. Amen.
Post Nomina
Audítis
nomínibus offeréntium, te pietatis Dóminum deprecámur, ut dignéris
nobis orátus assístere, adésse quæsítus, aperíre pulsátus.
Offeréntium
nómina cæléstibus adscríbas in páginis; promissiónem tuam maniféstes in
sanctis; misericórdiam osténdas in pérditis.
Et
quia imbecílla est nóstræ infirmitátis orátio, ut quid oráre opórteat
nesciámus, advocámus in suffrágio precum nostrárum recéptos in cælésti
collégio patriárchas, replétos divíno Spíritu prophétas, mártyres
confessiónis flóribus coronátos, apóstolos ad offícium prædicatiónis
eléctos.
Per quos orámus te Dóminum
nostrum, ut omnes metu térritos, inópia afflíctos, tribulatióne
vexátos, morbis óbrutos, supplíciis déditos, débitis obligátos,
indulgéntia tuæ remissiónis absólvas.
Spírituum
quoque pausántium memor esse dignéris, ut illis críminum suorum
indulgéntia relaxáta, ad sinum patriarchárum líceat pervénire.
R/. Amen.
Quia tu es vita vivórum, sánitas infirmórum ac réquies ómnium fidélium
defunctórum in ætérna sæcula sæculórum.
R/. Amen.
Ad Pacem
Dómine Iesu Christe, sanctórum cláritas meritórum et vera
beatificatárum felícitas animárum; dona ut qui resurrectiónis tue diem
lætándo cólimus, et litándo resúrgere ipsi per grátiam tuam bene
sanctéque vivéndo, et paci tuæ consentiéndo, ante nostrum óbitum
mereámur.
Et
sicut tibi pro tantæ festivitátis offício amíctus in nobis cándidos
exhibémus, ita per indulgéntiam tuam dealbáti supra nivem atque
mundáti, et géminæ dilectiónis dulcédine satiáti, univérsi críminis
nigrédine careámus.
R/. Amen.
Per te, qui es vera pax et perpétua cáritas, Deus noster, et regnas in sæcula sæculórum.
R/. Amen.
Illatio
Dignum et iustum est nos tibi grátias ágere, Dómine sancte Pater,
ætérne omnípotens Deus, et Iesu Christo Fílio tuo Dómino nostro.
Qui tecum simul et cum Spíritu Sancto hanc diem gémino lúminis decóre
sanctíficans, et luci eam dedicávit páriter et salúti.
In hanc non exstántia creans, in hanc creáta rediméndo salvíficans.
Hanc in conditióne tempórum primam, hanc in reparatióne hóminis effíciens gloriósam.
In ea lucem istam visíbilem creans, in ea hodiérnæ resurrectiónis glóriam maniféstans.
In hac quippe ipse, solútis dolóribus inférni, devícto diábolo,
triumphávit, cum mortem móriens vicit et sánguine suo terréna
cæléstibus reconciliávit.
Unde mérito illi omnes Ángeli, omnésque Sancti non cessant clamáre ita dicéntes:
Post Sanctus
Vere sanctus, vere benedíctus Dóminus noster Iesus Christus Fílius tuus.
Quem die tértia deflévimus mórtuum, et hódie gaudémus virtúte própria ab ínferis suscitátum.
Qui per mortem suam diábolum non virtúte, sed iustítia vicit, et per
glóriam resurrectiónis suæ viam reverténdi ad cælum peccatóribus
patefécit.
Christus Dóminus ac redémptor ætérnus.
Post Pridie
Precámur nunc, Dómine, sancte Pater ætérne omnípotens Deus, ut
quemádmodum Dóminus noster Iesus Christus Fílius tuus illa ineffabílium
gratiárum actióne semetípsum tibi pro nobis ófferens, mortem nostram
susceptúrus, audítus est, ita nunc et nos, qui ipsum et vitam eius
quærimus, exsequéndo ministeriáliter quæ instítuit, audiámus.
Ut hic tibi panis cum hoc cálice oblátus, in Fílii tui Corpus et
Sánguinem, te benedicénte, ditéscat, ac largo oris tui perfúsus
Spíritu, indulgéntiam nobis ómnium peccatórum largiátur et grátiam; et
collátæ a se salútis dono, donec in semetípso perfíciat, custódiam
adhíbeat indeféssam.
R/. Amen.
Te præstánte, sancte Dómine, quia tu hæc ómnia nobis indígnis servis
tuis valde bona creas, sanctíficas, vivíficas ac præstas nobis, ut sint
benedícta a te Deo nostro in sæcula sæculórum.
R/. Amen.
Ad Orationem Dominicam / Introducción al Padre nuestro
Christe Iesu bone, qui ad Patrem de cruce clamásti, tu nos in hac die
qua ipse de túmulo surrexísti ad te clamántes exáudi, quo
resurrectiónis tuæ hilaritáte perfúsi gaudéntium ora repleántur iúbilo
laudis, et corda efféctum percípiant exoratiónis, cum nunc exoravérint
ea quæ præcepísti.
Benedictio
Dóminus Iesus Christus qui pro totius mundi salúte móriens hódie
resurréxit a mórtuis ipse vos resurrectióne sua mortíficet a delíctis.
R/. Amen.
Quique per crucis patíbulum mortis destrúxit impérium, beátæ vitæ vobis tríbuat particípium.
R/. Amen.
Ut qui resurrectiónis eius diem cum lætítia præsénti celebrátis in sæculo, sanctórum mereámini in cæléstis regióne consórtium.
R/. Amen.
Auxiliánte sua misericórdia, qui vivit cum Deo Patre et regnat cum Spíritu Sancto unus Deus in sæcula sæculorum.
R/. Amen.
Cantus ad Accedentes
Mt 28,2-10
Gaudéte pópuli et lætámini. Ángelus sedit super lápidem Dómini, ipse
vobis evangelizávit. Christus surréxit a mórtuis Salvátor mundi et
replévit ómnia suavitáte. Gaudéte pópuli et lætámini.
V/. Et accédens revólvit lápidem et sedébat super eum, erat autem aspéctus eius sicut fulgur et vestiménta eius sicut nix.
R/. Christus surréxit a mórtuis et replévit ómnia suavitáte.
V/. Nólite timére vos, scio enim Iesum qui crucifíxus est quæritis non est hic, surréxit enim sicut dixit.
R/. Christus surréxit a mórtuis et replévit ómnia suavitáte.
Completuria
Explétis Dómine, in hac sancta sollemnitáte nostræ servitútis offíciis,
grátias tibi laudésque deférimus dono tuæ miseratiónis adiúti.
Precántes te, Deus, ut a peccátis nos ábluas et in tuis semper láudibus
exsultáre concédas.
R/. Amen.
Per misericórdiam tuam, Deus noster, qui es benedíctus et ómnia regis
per ómnia semper sæcula sæculórum.
R/. Amen.
[1] [2] [3] [4]